聖誕節

YEAH.......又到聖誕~~~~又到聖誕~~~~~~

每年聖誕節應該係天氣凍, 但今年好特別, 熱辣辣既聖誕節, 不過都好至少唔駛著到成隻熊咁樣.

今年聖誕節.......百感交集..........或許之前發生既事啦..........; 我只想好好咁過埋今年..........

明年..........半年為限............希望上半年能夠達成願望, 希望得到一個肯定既答案.............

半年限期過後................或許是新開始..............

坦白從寬?

小三那時很頑皮, 不但讀書成績差, 而且時時說謊, 當時我真的不想回家, 因每次回到家便捱罵, 真的不想回去.

那段時間成績差得很厲害, 默書測驗總是零分, 小朋友當然不敢給家長簽名, 所以我做了一件事, 就是冒家長簽名, 很可怕吧? 十歲左右的小朋友會做出這些事. 但這只是小朋友的天真, 最後當然給媽媽發現了, 記得那天她在書包中找到默書簿, 看到很多零分, 而且有"家長簽名", 她真的七孔生煙, 那時就像失去理智一樣, 不斷的打我.

她說: 成績差不重要, 但人格不可以差.

從此我不敢再說謊, 每事都坦白, 因為知道換來的後果是很痛的.

但原來有些事坦白了, 換來的結果也是很痛, 真的是坦白從寬嗎?

失控

哎呀~~~~~近來失控得太緊要啦~~~~~~~

又是自找麻煩的報應~~~~~~

棋局

人生就如棋局, 每行一步都將會影響以後的佈署, 舉棋不定, 往往就如站在十字路中感到迷茫, 頭腦清晰的人好, 少有舉棋不定的情況.

一個決定就足以令棋局輸得一敗塗地.

我怕輸, 永遠不敢下沒把握的棋, 棋局沒有捉完的, 即使輸也不要輸得那麼難看, 當一切都輸掉時, 或許是新開始.

一晚過後

一晚過後, 終於清楚自己最愛是誰..............

有時思想上有點越軌, 會令自己很惶恐, 這恐怕是自找麻煩.

天氣才剛剛轉涼, 但這個天氣真的令人不想起床, 很想懶在床上一直沉睡~~~~

混亂

好耐都無寫blog啦.......唔知以為個blog已經死左........

近來思緒很混亂, 什麼都弄不清, 甚至自己所愛是誰都弄得混亂, 很恐怖........

我好容易喜歡上他人, 亦好容易投入一段感情, 有時連自己都怕左自己.........

突然發覺自己好似喜歡上另一個人, 或者現在既感情生活令我實在太累, 所以更容易迷途.

我不想傷害任何人........; 更不想傷害他..........

無題

寫blog近一兩年才大肆興起, 但早於五, 六年前, 我已經有自己的網上日記, 當時差不多每天都寫, 每日對生活都有很多感覺, 然而時間過去了, 寫blog的熱情也減去, 或許是因為生活變得平淡, 變得不知有什麼可以寫.

男友星期日送來PSP一部, 佢話係補回生日禮物, 真係好, 又多一件玩物~~~~~~

早前係商場閒逛, 有一家時裝店寫著"T-Shirt $7", 一個好便宜既價錢, 那時剛好有2男2女經過, 其中一個女人話: 嘩, 七蚊一件衫? 買返屋企做地布都抵啦", 說畢眾笑.

我覺得很可恥, 香港係一個物資豐裕既社會, 區區一件衣服的確不算什麼, 但有無諗過, 世上有好多人, 連一件好好既衣服都無, 某些貧窮國家既人民每日收入都不足$7, 每日都要捱餓, 身為香港人, 食既足夠, 穿既足夠, 但從來無諗過他人生活.

突然覺得自己身為香港人很可恥.

聖誕咭

公司開始準備訂購聖誕咭, 見到色彩繽紛既咭, 就覺得好開心, 仲有兩個多月就聖誕節啦~~~~

小時候家環並不富裕(雖然而家都唔係富裕), 每年只有生日同聖誕節先可以買禮物, 所以聖誕節前夕, 都會諗下買咩禮物, 大富翁 / Lego / 模型.........

個時亦會跟同學交換聖誕咭, 臨近聖誕又會去文具店買賀咭, 一張又一張, 返到屋企又寫呀寫, 希望係假期前交換所有咭!!!

我同弟妹收集所有咭之後, 爸爸就會用繩掛起所有咭, 令到屋企充滿節日氣氛.

有時小小心思, 就能夠將平凡變得不平凡, 家境清貧都可以生活得好快樂.

被愛

表妹上月返港渡假, 係香港結識左一個男仔 (之前已認識, 但並不相熟), 個男仔對佢好好, 凡事放佢係第一位, 表妹覺得好開心, 原因佢男朋友對佢好差, 呼呼喝喝, 返加拿大無耐, 就正式宣佈同男友分手.

表妹有一個咁快既決定, 主要因為有好男仔出現, 另一個原因, 係因為我男朋友, 佢話最初睇到我同男友既合照, 覺得我男友好老土, 好木訥, 但返港後真正見面, 就覺得我男友好好, 好遷就我, 覺得我好幸福.

佢覺得係愛情裡面做"被愛"既人係幸福.

呢個係事實.

女人

女人好慘, 做女個時比屋企鍚, 嫁人後就慘過"妹仔".

出嫁前, 被父母疼鍚, 千金, 千金, 掌上明珠.

出嫁後, 不但要適應新生活, 更要侍候奶奶, 然而侍候不足就會被丈夫責罵.

試想女人下嫁男人, 最想得到丈夫既支持同體諒, 但男人認為, 太太可以轉, 媽媽唔可以轉, 基於呢個原則, 往往發生問題之後, 就請太太忍讓, 遷就.

男人呀~~男人呀~~~你地諗下啦, 女人嫁比你之後, 對佢來講你係唯一既親人, 亦係唯一可依靠既人, 假如連你都唔支持太太, 太太就會變得好無助同孤立, 同埋要想想陪你走人生路既人, 係你媽咪, 定係太太?

女人可以為男人付出所有, 包括自己既父母, 然而男人只會犧牲身邊既女人.

生日快樂

剛過去既星期一, 係我生日 - 8月28日 - 一個好易記既日期.

個日男友專程送一束鮮花來公司, 真係好開心, 仲要佢親自送來公司, 的確令我好感動.

男友係一個木訥既人, 浪漫嗎? 唔算, 懂說話嗎? 更不是; 但我就係喜歡佢老實, 穩重; 咁多年都唔需要擔心佢係外面有第二個女人, 佢比到安全感我.

心理學老師話: 點解女人要嫁人?

老師話: 一個女人嫁左之後係要幸福同快樂, 仲要身光頸靚 (我老師都好風趣架)

搵一個比到快樂同幸福自己既人, 要珍惜!!!

怪人之家

怪人家庭有3個子女, 2個女兒, 1個兒子, 在山中生活得很快樂, 一日, 一名流浪人途經這兒, 跟怪人其中一名女兒相遇, 那個女兒愛上這名流浪人, 怪人爸爸同媽媽眼見女兒多麼深愛這個男人, 便熱情招待, 希望女兒能跟這人開花結果.

流浪人在山中生活了幾年, 某天, 流浪人跟怪人女兒說：「我覺得你的家人很古怪」

女兒聽後很不快, 她的家人早已視流浪人為家庭成員之一, 但沒想到流浪人仍視他們為異族, 沒有想過融入怪人家庭.

女兒一直輕視了家庭的關愛與支持, 但當聽到流浪人這說話時, 她很討厭自己和流浪人, 後來流浪人離開怪人家, 而女兒亦等待下一個能接受整個家族的流浪人.

學位

噚日係大學公佈收生情況既大日子, 細佬亦知道城大收左佢, 今年好特別, 細佬妹都同時入到大學, 升讀學位課程.

我自己連預科都未讀過, 中五之後讀一年秘書課程就出來工作; 無咩學歷既我已經工作左9年, 呢9年裡面所見所聞, 從來想像唔到.

第一份工作, 會計師樓文員, 工作時間三年半, 呢個係我既學習期, 學左好多實用既知識, 對日後既工作相當有幫助, 當時傻下傻下咁樣, 一過就三年半~~~~

第二份工作, 工程公司會計, 工作時間三年, 呢個係我真正接觸全盤會計既機會, 再加上後來公司轉型, 所接觸所認識都跟過往唔同, 感覺好新鮮, 一過又三年~~~~

現在工作, 貿易公司會計, 工作時間兩年半, 呢個係我既休息期, 因為公司既工作挺輕鬆, 不過就多做左文件上既工作, 即係L/C, TR個類, 都有野學架~~~~

現時仲未知係唔係等到三年又轉一下? 思路仍然未清晰~~~~

神鵰俠侶

電視正上演《神鵰俠侶》金庸先生名著之一，金庸先生筆下既小龍女，不食人間煙火清麗脫俗，係一個男人見到心跳，女人見到妒忌既人，但事實上有幾多女仔係"小龍女"。

我好喜歡呢個故事，最令人窩心係楊過對小龍女既真心，16年用情專一，去等一個自己所愛既人，試問呢個世界邊有男人話自己可以做到。

然後男人總希望自己女友/老婆猶如小龍女一樣，不食人間煙火清麗脫俗，可惜有呢個希望之前，諗諗自己係唔係"楊過"先啦~~~~~

有時會諗假如小龍女並唔係咁靚，而係好似金三珣/增肥後既胡杏兒咁樣，楊過仲會唔會咁痴心去等呢個人???

呢個世界男人都係睇外表，多於內在美~~~~~

夏日炎炎

天氣炎熱, 最想人既係: 食雪糕, 游水, 歎冷氣..............

公司就係因有冷氣, 攪到成日都想訓~~~, 又涼又舒服, 加上老闆有時唔係公司, 食飽睡一睡, 好過做元帥, 呵呵~~~~~~~~~

噚晚同朋友去左書展, 無去幾年發現展館多開左, 參展商亦多左, 甚至連國內外既參展商都有, 內容比以前豐富得多; 雖然我只係買左幾本雜誌, 但已經好足夠, 根本唔夠力帶走咁多書, 幸好有位猛男幫我, 如果唔係就慘啦..............; 放工先去行只係得幾個鐘, 有少少唔夠喉, 不過都係算啦, 再去只會又破財!!!

朋友

6月底去左日本旅行, 因為有朋友住在日本, 因此有一個專業"導遊", 今次個trip真係好enjoy, 好relax, 食既好, 玩既好, 超爽享受~~~~~

朋友 - 不論去到世界各地, 只要大家心裡存有對方, 感情仍然不變, 係日本呢位朋友, 其實係男朋友既中學同學, 而佢朋友住係日本已經十年, 兩個十年見面不多, 閒來只係傾下電話, send下e-mail, 但當我地去到日本, 就感受到佢地兩個之間有好深既感情, 整個trip都講起少年時代發生既事, 好有趣.

但令我最有趣既係..............去左日本5日, 我唔想再返來~~~~~~

壓力

「我有壓力、你有壓力」呢句說話應該無人不識，的確每個人都有壓力。

近來妹妹發生了一些事，父母都為此而擔心，其實所發生既事都只係人生經歷之一，唔需要過份緊張吧！父母疼錫子女乃人之常情，可惜過份既疼錫就會令子女喘不過氣，往往變成我地既壓力。

有時我真係唔知點樣面對父母，因為佢地凡事著緊凡事擔心，難免有好多事都不願意同佢地講，從此就將所有事收於心底，久而久之就習慣將感覺收埋。

其實好多時都不滿父母既做法同思想，但我沒法子改變，唯有繼續將事收於心內。

追求

上回提到外公健康問題, 醫生話外公身體雖然係差左, 但並非嚴重, 只需要多做物理治療就可得改善, 總算安心落來.

人生其實好簡單, 有健康, 有家人, 有朋友, 就已經足夠, 但現今社會往往忽略當中某些, 令人生變得不易滿足, 或許現時大家追求都係物質上既生活, 但內心呢? 內心追求又係咩?

下月要做靈修分享, 對於我呢類真係"零"修既人, 的確係一份好大既"功課", 唔.........或許要立定決心, 好好做呢份"功課", 如果以"追求內心生活"為題, 唔知好唔好呢!?

珍惜

外公上星期因腳痛入院, 噚晚六點左右打電話比我地, 話醫生比佢出院, 當時媽咪話第二日去接佢, 但外公發脾氣, 後來費盡唇舌先勸得服佢.

今日媽咪同舅父到醫院接佢出院, 誰知護士小姐話無咁既事, 無人批准外公出院, 後來舅父問外公點解咁樣講, 就發現外公問非所答, 根本唔知講咩, 甚至最初個時連舅父都認唔出............; 妹妹話呢個係老人痂呆症既病徵, 當然我地唔係醫生唔可以斷定什麼..............

外公係一個最疼錫我既人, 小時候外父一直帶我係身邊, 直至入讀小學後我先跟返媽咪, 我係一個不孝既人, 多年來都好少探望佢, 而家佢有事啦, 我又幫唔到手感覺好內疚.

珍惜身邊人, 珍惜家人共聚既日子, 亦盼外公慢慢康復.

我願意

噚日參加朋友既婚禮，感到好開心同幸福，雖然去教堂參加婚禮並唔係第一次，但今次特別感到幸福，可能因為新娘係宣讀結婚誓詞時落淚，場面令人感動.............

有一位長老向呢對新人訓勉時提及到，婚姻並非每日係沙灘上浪漫咁奔走，亦唔係每日都風平浪靜，婚姻係二人互相支持，面對難關時要一齊承擔。

兩個人要決定走向人生另一階段，並唔係一個簡單念頭，當中有委身有付出甚至犧牲，假如自己不肯定是否接受呢個挑戰，的確唔好考慮結婚。

我認為一生人只可擁有一段婚姻，既然只得一次就應該好好諗清楚，一生既承諾，講就容易做就很難，眼見好多夫婦都落得離婚收場，很無奈，所以婚姻並唔係遊戲，需三思而後行！

傳聲筒

公司近來同一家供應商發生拉鋸戰, 而我就成為呢件事既"傳聲筒", 整天把他們的訊息傳來傳去, 感到很煩, 我不懂處理什麼"生意"上的問題, 就係咁樣上星期出左問題, 最後比老闆話左幾句, 唉........

供應商就話, 我地訂晒貨就要即時比錢, 我老闆又話邊有人一訂貨就full payment, 一半訂金就差唔多, 就係因為呢件事, 令到我成為"傳聲筒".

站於公司立場, 我覺得老闆講既係無錯, 邊有人一訂貨就即時full payment, 問題係個D貨要2-3個月後先收到, 係商業角度上, 鬼信你咩, 點知3個月後你間公司會唔會執架. 但在於供應商立場, 訂單我都同工廠確定好, 假如到你唔要貨咁咪死.

今次真係公說公有理, 婆說婆有理.......

唉.............e-mail...........又來啦..............

戀愛日誌

多年前同男朋友利用ICQ傾計, 當時大家只係朋友, 談論話題都只係日常生活中的小事, 誰知就係咁樣就談出愛情. 最令我吃驚既係, ICQ HISTORY日期顯示7月29日, 當日我問男友中文全名同生日日期, 但不到半個月我地就正式開始; 原來當時只係經歷不到一個月的時間, 難怪當時朋友都話太突然.

我跟認識只有一個多月的男子交往, 差不多四年啦, 呢幾年來大家都覺得很舒服, 唔駛改變自己去迎合對方, 想做乜就做乜, 很隨意, 很自在的感覺.

噚晚男朋友話, 以後我用手提電話打比佢, 個聆聲就會係林子祥的"分分鐘需要你", 其實我想佢用張學友的"你的名字我的姓氏"~~~~~

"騎尼"人

同事快要離職, 同時公司開始做interview..........; 原來而家好多"騎尼"人........


第三位:

公司要求應徵者帶來證書正本及照片一張, 同事要求對方交出照片, 誰知對方比以下既答覆:
"唔好意思呀, 匆忙得滯, 唔記得帶, 不過唔緊要啦, 你係張cert.上面撕落來啦.........."


第二位:

有人打電話到公司, 內容如下:
"我係來見工, 我已經係門口企左好耐都無人............"

但係.........我公司係有門鐘............


第一位:

有人預約左來見工, 後來改左時間, 但係到時候都唔見人, 我同事就打電話比佢啦, 結果就係咁:

應徵者: 我其實已經到左架啦, 不過突然醒起個爐未熄, 我而家返屋企熄
同事 : 咁你下晝會唔會過來?
應徵者: 下晝呀!? 我返左屋企唔想出來啦喎
同事 : 咁聽日呢?
應徵者: 咁呀.........唔........都係唔啦, 放棄啦


天呀..........點解而家既人會係咁架...............

唉.......又失敗

第2次 - 製作豆腐花 ............失敗; 不過我會再接再厲既......... (v_v)

噚日某大型電器店開倉, 結果又跌錢............; 今次買左部nokia 3250, 即係電視而家賣緊廣告個部, 呢部電話係送比"好朋友"...........; 做我"好朋友"其實都係幸福呀.............呵呵 \(^v^)/

爸爸為左某些事同人爭執, 返到屋企check血壓, 竟然去到一百六十幾, 正常人係一百二十, 唉........老人家真係唔好動氣, 我地都叫佢冷靜, 但係爸爸既性格一向火爆, 真令人勞心.........

異國朋友

今日lunch個時Kelly帶來一位老外, 起初以為呢位異國人士係Kelly公司既客人, 誰知佢地竟然只係於電梯內碰面, 事前亦都唔認識, 真係佩服Kelly呢份勇氣.

呢位異國朋友係男士, 名已經唔記得, 不過佢個人都算係nice, 同我地有講有笑, 我既英文係"有限公司", 好在都仲溝通到不至於出醜.........呵呵..............

老外係塞浦路斯人, 有著歐洲人的鼻子, 可能外國人既關係, 總覺得佢好熱情, 好friendly, 我媽咪係外國人教堂工作, 佢覺得同外國人相處比中國人好, 因為外國人大多熱情友善, 不拘小節.

今日既經歷都幾特別啊!!!!

塞浦路斯共和國 (小小資料)
- 位於地中海東北部、扼亞、非、歐三洲海上交通要衝，為地中海第三大島
- 主要語言為希臘語和土耳其語，通用英語
- 希臘族信奉東正教，土耳其族信奉伊斯蘭教
- 在意大利畫家波提切利的名畫《維納斯的誕生》中，身材頎長的金髮美人冉冉地從大海的泡沫中升起。這位古希臘神話中愛與美神阿芙洛蒂特(維納斯是她在古羅馬神話中的名稱)的誕生聖地，就是塞浦路斯

失敗之作

今日第一次做豆腐花, 結果失敗左.........., 做完之後都係豆漿, 一D都唔凝固, 究竟出左咩問題呢!? 不過我會再嘗試直至成功為止.

做蛋糕, 做甜品, 一直都係失敗居多, 只係有幾次成功, 呢方面無論失敗幾多次, 都從來無放棄過, 因為我相信人地做到既事, 我都必定做到, 所以失敗既作品真係數之不盡...........; 有時都覺得幾浪費食物.........唉..............

猶如昨晚, 媽咪因事煮唔到飯, 呢個重任就交由我去處理, 可惜...........到最後都係失誤, 結果同媽咪煮既差得好遠, 之後仲要比細佬話: 呢D咩來架, 下次都係我煮啦............

睇來真係要好好訓練一下先得...................; 係邊度搵隻"白老鼠"呢!?

累

唔知係天氣問題, 定係個人問題, sleep好耐都仲好累........, 而且質素好差, 已經成個星期啦..........

噚日放工去左開倉sales, 可惜無收穫, style都唔岩我, 不過仲好啦, 已經所餘無幾, 再買野就真係唔掂啦, 但仍然想買多一對鞋.

近日無記做一套關於女人既電影劇, 當中講到姐弟戀, 坦白講我唔接受姐弟戀, 可能鍾意成熟既男士, 太細就會好似細佬咁.......受唔住; 身邊好多朋友都係姐弟戀, 當然距離唔係7年啦, 有時真係好想了解下佢地既心理, 或許可以令我改觀.

150cm的我

早幾日係書店, 見到一本名為《150cm Life》既漫畫, 作者係一個只有150cm既女仔, 書中所描繪既事, 非常有同感..........; 因為我都係得150cm...........; 係書店睇呢本書個時, 真係忍唔住就笑左出來, 因為所講既事都係發生過.

不過從來都無因為身高而感到唔開心, 相反生得矮比人感覺永遠都長唔大, 睇起來似一個小朋友, 唔會老.......呵呵

雖然好鍾意呢本書, 但最後都無買, 因為太貴啦, 本書應該只有1.5cm咁厚, 就要買成$67........., 會唔會貴左d呀, 等遲D大減價個時先買.